Жаһандық инновациялық индекс Қазақстанның креативті экономикасының әлеуетін бағалау құралы ретінде: ұстанымдар мен міндеттер

Аңдатпа

Зерттеудің мақсаты – инфрақұрылым, зерттеу және инновациялық қызмет, білім беру жүйесі, сондай-ақ бизнестің жаңа технологияларды енгізу қабілеттілігі сияқты факторлардың Қазақстандағы креативті индустриялардың дамуына әсерін талдау. Әдістер – жүйелік талдау, логикалық әдіс, сондай-ақ салыстырмалы талдау сияқты жалпы ғылыми әдістерді қолдану ақпаратты жүйелеуге, әртүрлі факторлардың салдарын талдауға және ұсынымдар әзірлеу кезінде назар аударуға тиіс негізгі тұстарды айқындауға мүмкіндік берді. Инновациялық даму көрсеткіштері мен креативті индустриялар динамикасы арасындағы өзара байланыстарды зерттеу үшін рангілік корреляцияның статистикалық әдісі пайдаланылды. Нәтижелер – зерттеу Қазақстанның инновациялық әлеуетін және креативті экономиканың даму үрдістерін Жаһандық инновациялар индексі (GII) деректері негізінде талдауға бағытталды. Инновациялық дамудың негізгі көрсеткіштері бойынша Қазақстанның ағымдағы позициялары қарастырылып, креативті экономиканың өсуі үшін аса маңызды бағыттарға ерекше көңіл бөлінді. Алынған нәтижелер негізінде елдің инновациялық экожүйесін жетілдіру, креативті индустриялардың дамуын ынталандыру және олардың орнықты дамуына жағдай жасауға бағытталған ұсынымдар әзірленді. Қорытындылар – мемлекеттік қолдау мен жеке бастамаларды біріктіретін ұзақ мерзімді стратегиялық көзқарас Қазақстанның Орталық Азиядағы инновациялар мен креативті саланың өңірлік орталығына айналуына мүмкіндік береді.