Цифрлық дәуірдегі Қазақстанның қаржылық экожүйесін қалыптастырудағы банктік инфрақұрылым

Аңдатпа

Мақсаты – Қазақстандағы цифрландыру жағдайында банк инфрақұрылымының дамуының қаржы экожүйесін қалыптастыруға әсерін зерттеу. Зерттеудің негізгі міндеті – инфрақұрылымдық өсім мен макроэкономикалық көрсеткіштердің арасындағы себеп-салдарлық байланыстарды анықтау. Әдістері – банк карталарының, POS-терминалдардың және банкоматтардың саны сияқты инфрақұрылымдық айнымалылар мен жалпы ішкі өнім (ЖІӨ), жан басына шаққандағы ЖІӨ және халық саны сияқты макроэкономикалық көрсеткіштер арасындағы өзара байланысты бағалау үшін сандық, корреляциялық және регрессиялық талдау әдістері қолданылды. Нәтижелері – талдау нәтижелері банк инфрақұрылымының кеңеюі мен экономикалық өсудің негізгі көрсеткіштері арасында тұрақты оң байланыстың бар екенін көрсетті. Қаржы инфрақұрылымын жаңғырту цифрлық қаржылық қызметтердің қолжетімділігін арттырып, неғұрлым инклюзивті және тиімді қаржы жүйесіне көшуге ықпал ететіні анықталды. Қорытындылар – банк инфрақұрылымы ұлттық экономиканың цифрлық трансформациясының негізгі қозғаушы күші болып табылады. Зерттеу нәтижелері цифрлық қаржы саласындағы мемлекеттік саясатты жетілдіруге, инвестициялық басымдықтарды айқындауға және қаржылық инклюзияны кеңейту мен Қазақстанның цифрлық ортадағы бәсекеге қабілеттілігін арттыруға бағытталған тұрақты бизнес-модельдерді әзірлеуге пайдаланылуы мүмкін.