Табиғи ресурстарды басқару және сапасын бағалауға арналған мемлекеттік аудит механизмдерін жетілдіру: Еуропалық Одақ тәжірибесі

Аңдатпа

Табиғи ресурстарды тиімді басқару – мемлекеттік реттеудің маңызды бағыттарының бірі, әсіресе экологиялық қауіптердің артуы жағдайында. Мемлекеттік аудит механизмдері табиғи ресурстарды пайдаланудың ашықтығы мен заңдылығын қамтамасыз етуде шешуші рөл атқарады. Бұл зерттеуде Еуропалық Одақтың (ЕО) табиғи ресурстарды басқару саласындағы мемлекеттік аудит тәжірибесі қарастырылып, оның Қазақстанда қолдану мүмкіндіктері бағаланады. Зерттеудің басты мақсаты – ЕО-ның аудиттік стратегияларының тиімділігін талдау, соның ішінде Ортақ ауыл шаруашылығы саясаты (CAP) шеңберіндегі мониторинг пен стратегиялық жоспарлау тетіктерін қарастыру. Зерттеу барысында сапалық және сандық әдістер қолданылды, соның ішінде халықаралық тәжірибелерді салыстырмалы талдау және реттеу тетіктерін бағалау әдістері пайдаланылды. Нәтижесінде Қазақстанға бейімдеуге болатын негізгі қағидалар анықталды: экологиялық көрсеткіштерді аудитке енгізу, екі деңгейлі стратегиялық есеп беру жүйесі, мемлекет пен жеке сектордың өзара іс-қимылын дамыту, сондай-ақ табиғи ресурстарды тұрақты басқаруға арналған қаржылық ынталандыру шараларын енгізу. Зерттеу нәтижелері Қазақстандағы мемлекеттік аудит жүйесін жетілдіруге, табиғатты қорғау саясатының тиімділігін арттыруға және елдің экономикалық тұрақтылығын қамтамасыз етуге бағытталған ұсыныстарды әзірлеуге негіз болады.