Қазақстандағы екінші деңгейлі банктердің транзакциялық белсенділігінің елдің макроэкономикалық көрсеткіштеріне және ЖІӨ-ге ықпалы

Аңдатпа

Жедел өзгеріп жатқан макроэкономикалық үрдістер мен тұрақты экономикалық күйзелістер жағдайында ұлттық экономиканың тұрақтылығына әсер ететін факторларды жан-жақты талдау өзекті мәселе болып табылады. Бұл зерттеуде Қазақстандағы екінші деңгейлі банктердің транзакциялық белсенділігі ЖІӨ, кедейлік пен жұмыссыздық деңгейі сияқты макроэкономикалық көрсеткіштерге әсер ететін негізгі фактор ретінде қарастырылады. Мақсат – банк операциялары мен әлеуметтік-экономикалық даму арасындағы байланысты цифрлық трансформация жағдайында талдау. Ғылыми маңыздылығы – экономикалық тұрақтылықты зерттеуді тереңдету, ал практикалық мәні – банк саласын жаңғыртуға бағытталған ұсынымдар әзірлеу. Зерттеу әдістемесі ретінде 2013–2023 жылдар аралығындағы ресми деректерге корреляциялық және регрессиялық талдау қолданылды. Нәтижесінде транзакциялық белсенділік пен ЖІӨ өсуі арасында оң күшті байланыс (r = 0.92) анықталды. Сонымен қатар, цифрлық қаржылық қызметтер қаржыға қолжетімділікті арттырып, кедейлікті азайтуға және өмір сүру сапасын жақсартуға ықпал ететіні дәлелденді. Бұл жұмыс банк секторы дамуының келешек эмпирикалық зерттеулеріне негіз бола алады.